Shirika la umeme nchini (Tanesco), limetangaza nchi kuingia ‘gizani’
kwa wiki nzima kuanzia leo kutokana na kuzimwa kwa mitambo ya gesi
inayozalisha umeme kutoka Songosongo na kuanza majaribio ya gesi ya
Mtwara.
Aidha, Mkurugenzi Mkuu wa Tanesco, Felchism Mramba, aliwaambia
waandishi wa habari jana baada ya kutembelea mtambo wa Kinyerezi I, kuwa
sasa Watanzania wategemee umeme wa uhakika baada ya kuanza kuzalisha
umeme kwa gesi ya Mtwara.
Alisema tayari gesi imeanza kuingia kwenye mtambo wa Kinyerezi I na
Ubungo II na kwamba kinachofanyika sasa ni majaribio ya kusukuma
mitambo ya Ubungo II na Symbion kwa ajili ya uzalishaji.
“Kwa hiyo kesho (leo), tutazima mitambo yote ya gesi ya Songosongo
ili kuanza kazi ya kuunganisha bomba la gesi kutoka Mtwara…wakishaunga,
kutakuwa na kazi ya kufanya majaribio ya hapa na pale, kazi ambayo
tunategemea itachukua kama wiki moja hivi,” alisema.
Aliongeza kuwa: “Wananchi wamekuwa wakifuatilia sana umeme, lakini
niwaambie tu kuwa tutaendelea kuwa na tatizo hadi Septemba 15 kwa sababu
tunataka kuingiza kitu kipya, lakini tunategemea baada ya wiki moja,
umeme utaongezeka zaidi.”
Alisema hali ya umeme kwa siku ya leo itakuwa mbaya zaidi kwa kuwa ‘mitambo yote itakuwa imezimwa.’
Alisema kazi ya kuunganisha bomba hilo itaihakikishia nchi kuwa na
umeme wa uhakika hata kama mabwawa ya maji yanayotumiwa kuzalisha umeme
yatakuwa yamekauka.
Alisema gesi ya Mtwara inategemewa kuendesha mtambo wa Ubungo II
wenye uwezo wa kuzalisha MW 105, Symbion (MW 112) na Kinyerezi I (MW
150).
Mramba alisema mtambo wa Ubungo I utaendelea kuzalisha umeme kwa
kutumia gesi ya Songosongo na kwamba Ubungo II inatumia gesi ya Mtwara
kwa kuwa inatosha kuendesha mitambo hiyo.
Alisema hadi jana, mafundi walikwisha unganisha bomba la gesi
kutoka Mtwara na kituo namba 15 Ubungo tayari kwa kuanza uzalishaji.
Kwa mujibu wa Mramba, mikoa itakayoathirika ni yote inayopata umeme
wa Gridi ya Taifa ukiwamo Dar es Salaam, Pwani, Tanga, Kilimanjaro,
Arusha, Dodoma, Morogoro, Singida, Mwanza, Mara, Mbeya, Iringa, Tabora,
Shinyanga, Manyara na Zanzibar.
Naye Mkurugenzi Mkuu wa Shirika la Maendeleo ya Petroli (TPDC), Dk.
James Materegeo, alisema mchakato wa kuchukua gesi kutoka mitambo ya
Madimba mkoani Mtwara imekamilika juzi na kazi inayofanyika ni ya
majaribio.
Alisema juzi, TPDC ilianza kusukuma gesi kutoka Mtwara hadi
Kinyerezi I kwa mgandamizo wa 3 (3 bar) na kwamba ili uzalishaji wa
umeme ufanyike kwa uhakika, mgandamizo huo unatakiwa kufikia 50.
“Kuanzia leo hadi kama wiki moja hivi tutakuwa tumefikia mgandamizo wa 50 unaotakiwa kitaalam,” alisema.
Alisema uzalishaji wa umeme kwa kutumia gesi ya Mtwara utaisaidia
serikali kuokoa takribani Dola za Marekani bilioni moja kwa mwaka ambazo
zilikuwa zinatumiwa kununua mafuta mazito ya kuzalisha umeme.
Post a Comment